Related Posts
Category : National
સંસદમા સાસંદોની લાલીયાવાડી નહી ચાલે, સાંસદોની હાજરી નોંધાવવાની નવી સિસ્ટમ
લોકસભાના ચોમાસુ સત્ર દરમિયાન સાંસદોની હાજરી નોંધવાની એક નવી પદ્ધતિ રજૂ કરવામાં આવશે. એવું કહેવામાં આવી રહ્યું છે કે, હવે સાંસદોએ તેમની બેઠકો પર ઇલેક્ટ્રોનિક રીતે હાજરી નોંધાવવી પડશે, અગાઉ સાંસદોએ લોબીમાં જઈને રજિસ્ટરમાં તેમની હાજરી નોંધાવવી પડતી હતી. નવી પદ્ધતિ સમય બચાવવામાં મદદ કરશે
અત્યાર સુધી જ્યારે લોબીમાં હાજરી લેવામાં આવતી હતી, ત્યારે ઘણી વખત ત્યાં ભીડ રહેતી હતી. આ ઉપરાંત કેટલાક સાંસદો ફક્ત તેમની હાજરી નોંધીને જતા રહે છે અને કાર્યવાહીમાં ભાગ લેતા નથી; આવા કિસ્સાઓ પણ બંધ કરવામાં આવશે. સૂત્રોના જણાવ્યા અનુસાર, લોકસભા સ્પીકર ઓમ બિરલા આ નવી પદ્ધતિ લાગુ કરવા આતુર છે. જો કે, શરૂઆતના દિવસોમાં જૂનું લોબી રજિસ્ટર પણ ચાલુ રહેશે, જેથી સાંસદો નવી ઇલેક્ટ્રોનિક સિસ્ટમથી પરિચિત થઈ શકે.
ગયા વર્ષે લોકસભા અધ્યક્ષ ઓમ બિરલાએ પણ સાંસદોને ડિજિટલ પેન અને ટેબ્લેટ દ્વારા લોબીમાં હાજરી નોંધાવવાનો વિકલ્પ આપ્યો હતો, જેનાથી સંસદને પેપરલેસ બનાવવાની દિશામાં એક પગલું ભર્યું હતું. આ અગાઉ સાંસદો લોકસભા ભવનની લોબીમાં જઈને એક રજિસ્ટર પર સહી કરતા હતા. આ રજિસ્ટર ત્યાં તૈનાત સ્ટાફ દ્વારા પૂરું પાડવામાં આવે છે. સહી કર્યા પછી જ સાંસદની તે દિવસની હાજરી ધ્યાનમાં લેવામાં આવે છે.
મળતી માહિતી અનુસાર, નવી સિસ્ટમ હેઠળ સાંસદો હવે પોતાની સીટ પર બેસીને હાજરી નોંધાવી શકશે. બધા સાંસદોની સીટ પર ડિજિટલ સિસ્ટમ લગાવવામાં આવી છે. પોતાની સીટ પર બેઠેલા સાંસદો બાયોમેટ્રિક/સ્માર્ટ કાર્ડ દ્વારા પોતાની સીટ પરથી સીધી હાજરી નોંધાવી શકશે. આનાથી લોબીમાં ભીડ ટાળી શકાશે અને સમય પણ બચશે.
તમને જણાવી દઈએ કે, સાંસદોએ ગૃહની અંદર પોતાની હાજરી નોંધાવવી જરૂરી છે. કારણ કે તેમની હાજરી સીધી રીતે તેમના ભથ્થાં અને પગાર સાથે સંબંધિત છે.
Load more
